東華三院文武廟噚日舉行文昌啟智禮，逾百名父母同學生去輪候參拜，祈求學業進步，名列前茅，佢哋準備充足，有小學生孭住沉重書包參拜，入面載滿棋藝書、小提琴譜等課本，亦有善信帶齊一家大小照片參拜，想拿取多份開光紀念品，祈求家人學業工作順利。
東華三院今年特別喺文武廟入面地下貼上錦繡前程、學業猛進、名列前茅、步步高陞Q版貼紙，引領善信進入廟內參拜祈福，仲特別製作388條藍色彩帶，仲有增運福物，以先到先得免費派發給善信，締結文昌善緣，仲邀請道長主持功德科儀，燃點文昌四寶燈及開啟青雲路，祝願善信同學子步步高陞，聰明勤奮，學業有成，其中一名市民麥太帶埋個仔排隊，佢同八方講年初曾去文武廟祈福，今次再帶佢嚟啟知禮，仲叫個仔孭埋個書包去㖭！