曼聯啱啱喺星期日嘅雙紅會就輸咗俾利物浦，不過一班前魔兵就似乎順風順水，其中效力緊荷甲阿積士嘅「盲仔」戴利白蘭特（Daley Blind）仲首次連中三元，幫球隊狂數對手8:0，唔知摩連奴呢刻有冇少少掛住佢呢？
阿積士喺星期日嘅聯賽主場迎戰榜尾球隊迪加史卓普，呢支荷甲第二位球隊今場就上演咗一幕大屠殺，開賽僅18分鐘就靠杜辛泰迪治先開紀錄，之後分別再有馬沙拉奧同薛耶治喺25同32分鐘建功，阿積士半場遙遙領先3:0。
領阿積士狂炒迪軍8:0
換邊後阿積士仲未肯收手，薛耶治62分鐘再入一球，之後就輪到盲仔喺65分鐘遠射得手，幫球隊領先到5:0。薛耶治喺69分鐘入多球完成「帽子戲法」，白蘭特喺餘下嘅時間就繼續表演，分別喺74同90分鐘再入兩球，協助阿積士以8:0血洗對手。今次係28歲嘅盲仔職業生涯第一次「戴帽」，佢之前效力曼聯四季各項賽事合計都只係入過六球，今季一返到阿積士，一場波都已經打破咗佢單季入球紀錄，認真威威，唔知佢有冇叫啱啱攞咗金童獎嘅隊友馬菲斯迪歷特講聲，叫佢如果第時有機會去曼聯嗰陣要諗清楚呢？
阿積士亦都唔失禮，今場8:0橫掃迪加史卓普，係球隊近17年嚟喺荷甲主場嘅最大勝仗，對上一次已經要數到2001年3月大勝鹿特丹斯巴達9:0喇。
「天使」迪比踢出彩虹
以前啲球迷成日都笑阿仙奴球員離開兵工廠之後就有冠軍攞，唔知家陣會唔會改口話「離開曼聯嘅球員有好結果」呢？除咗白蘭特今季喺阿積士重生外，有唔少近年脫魔嘅球員家陣都發展得唔錯㗎，好似伊巴謙莫域同「天使」迪馬利亞咁，兩個分別喺美職聯同法甲踢到風生水起。
至於效力緊里昂嘅迪比亦都好勁，上季佢就喺法甲轟入咗19球，一離開曼聯好似成個人都精神咗咁。雖然效力曼聯嗰兩季都算係迪比嘅低潮，不過佢最近就話希望重返奧脫福喎：「我離開嗰陣同摩連奴講過，佢會睇到我最好嘅表現，佢都同我講：『好，我期待你嘅表現，我希望有一日買你返曼聯』。」今季入球力疲弱嘅紅魔，唔知又有冇諗起迪比呢？