操盤手札記:經濟托底靠基建 - 割柑人

操盤手札記:經濟托底靠基建 - 割柑人

喺改革開放40周年大會舉行前夕,滬股升4點,港股跌6點。市場觀望氣氛濃厚,靜待大會翌日召開嘅中央經濟工作會議,以及美國聯儲局議息。無論中國抑或美國,經濟都走下坡。中美貨幣政策,都有機會放鬆。若然落空,咁今年嘅Santa Claus Rally就凍過水。

今年以嚟港股累跌13%,有冇仇報?上周恒指先後出現「島形底」、「島形頂」;本月以嚟更出現兩個「島形頂」、一個「島形底」。半個月出現七個裂口,非常罕見,反映市底脆弱,容易被人藉消息舞高弄低。

港股後市,短期或先行回補上周嘅上升裂口(25861至26013)。上升裂口一旦回補,即支持位失守而會再跌。近日大行齊聲唱淡明年經濟同股市,不明朗因素多,揸現金較穩陣。若想短炒搵食,則可吼近日轉強嘅板塊如鐵路基建,但要緊記止蝕戒條。

拉動中國經濟嘅三頭馬車——消費、投資、出口,喺中美貿易戰下,出口大受衝擊。出口動力減弱,投資勢成主力,基建投資料成經濟托底嘅手段。國統局日前公佈,1月至11月基建投資增長3.7%。喺撐經濟大前提下,交銀國際預計,明年將回升至10%左右。

基建三寶中,中鐵建(1186)同中鐵(390)主業係鐵路,中交建(1800)則係公路。當中,中鐵建係中國最大嘅鐵路建設商,亦係公路工程承包商之一。集團上月接連中標三洋鐵路三禹段、遵義市高鐵新城二期等項目,累計手頭合同係舊年營業收入近三倍。

基建股上周中炒起,中鐵建本周一繼續破頂,兼10天線升穿20天線,出現小黃金交叉。以現價11.06元計,預測市盈率不足7倍。過去兩年,中鐵建純利維持雙位數字增長,由於明年潛在新簽合同增長復蘇,以及未完成合同增長高過同業,不妨候低吸納。

割柑人
本欄逢周二刊出