中央領導人每次見特首述職或發表對港講話，總有幾句「真言」畀香港人估佢有乜含意，噚日國家主席習近平見特首林鄭月娥，佢就用咗「志不求易、事不避難」八字真言讚林鄭，正當好多人翻查「志不求易、事不避難」出自何經何典、背後有何微言大義，娥特噚日自揭玄機：原來八字真言係出自娥特把口同佢寫嘅《施政報告》！
曾用於《施政報告》及答問大會
話說習近平讚娥特「志不求易、事不避難」，其實相當符合娥特「好打得」稱號，但習喺邊到搵到呢八隻字？噚日娥特係總結行程的記者會入面，比記者問點睇習用呢八隻字讚佢，娥特即笑住話呢八個字係佢用㗎！仲話記者可能聽得少！娥特解釋佢過往喺演辭或者《施政報告》都用過呢八字，佢估計習都聽過佢講，所以噚日用番呢八字，想對佢工作加以肯定，娥特仲認為習主席冇乜特別意思。
八方翻查資料，原來舊年10月立法會施政報告答問會，民建聯梁志祥問娥特如何令不同立場同利益嘅人士達成共識，管治新風格如何做到融和。娥特答佢自己管治新風格就係「志不求易、事不避難」，就算有事情引起批評同攻擊，政府都會迎難而上。照咁睇習今次八字真言，真係出自娥特，連主席都有記得佢講過乜，唔怪娥特今次述職咁開心。
李八方