北區醫院屢爆醫療事故，唔少人都認為醫院質素有待改善，而新民黨立法會議員容海恩近日就好進取，喺北區掛出橫額，要求北區醫院大翻新，不過有區內網民睇真啲個橫額，容海恩唔係要求北區醫院「翻新」而係「翻身」！
「鬼揞眼呀呢次」
呢幅寫住「促請政府加快北區醫院擴建及翻身工程」橫額喺網上引起討論，網民笑爆成個新民黨中文唔及格，又話過大海輸錢先會要翻身，更有醫療界中人講笑話，睇到仲以為醫管局好唔掂，搞到北區醫院欠落好多街數要「翻身」！容海恩承認其實係手民之誤，將醫院擴建兼「翻新」寫錯做「翻身」，又話真係「鬼揞眼呀呢次」，出街前佢睇過，助理睇過，黨睇過，竟然都冇人睇到有錯，不過佢話冇得賴，錯就要認，「錯別字都情有可原，但今次唔係多咗點多咗撇咁簡單嘛」。佢話已經安排義工盡快去換走橫額，好彩只係得三幅，唔係就造成好大浪費啦。