應屆亞冠盃冠軍鹿島鹿角喺上星期六嘅世冠盃，以3:2擊敗中北美洲代表瓜達拉哈拉晉身四強，星期三將會繼2016年決賽後再次硬撼皇家馬德里。
鹿島今場開賽僅三分鐘就失守，不過換邊後鹿島即刻扳平，永木亮太49分鐘接應土居聖真橫傳撞入，到69分鐘鹿島外援沙真奴主射12碼得手成功反先，加上後備入替嘅安部裕葵84分鐘喺禁區內左路射入世界波，幫鹿島領先到3:1。
雖然瓜達拉哈拉喺補時階段追番球，但最後鹿島都以3:2贏波。晉級四強嘅鹿島下仗將會硬撼歐洲代表皇馬，鹿島教練大岩剛喺賽後表示，希望可以一報兩年前嘅一敗之仇。
至於皇馬喺上星期六西甲靠前鋒賓施馬射入奠勝球，主場以1:0小勝華歷簡奴，聯賽三連勝後喺暫時升上第三位，但係因球隊表現未見突出，再次喺巴拿比奴球場俾球迷喝倒采。