上星期六意甲嘅都靈打吡，祖雲達斯作客1:0擊敗同市宿敵拖連奴，一箭定江山嘅祖記星級前鋒基斯坦奴朗拿度（C朗），仲射入咗祖記喺意甲歷史上嘅第5,000個入球㖭，真係威到盡。
任劊子手1:0贏拖連奴
拖連奴今場雖然有主場之利，不過就冇乜運喇，球隊嘅正選門將沙華托尼施利古先喺20分鐘就因傷退下火線，要由後備門將伊查素把關。到下半場70分鐘，拖連奴嘅施蒙尼沙薩回傳失誤，俾祖記嘅文迪蘇傑偷到個波，搞到伊查素情急之下撲跌咗呢位克羅地亞前鋒被罰12碼。
祖記由C朗操刀建功，幫球隊領先1:0，不過C朗入波之後就因為故意衝撞伊查素因被罰黃牌。另外文迪蘇傑喺73分鐘雖然曾經破網，可惜佢嘅拍檔C朗越位在先，慘食詐糊，祖記最後以1:0贏咗呢場都靈打吡，繼續喺意甲保持不敗，以16戰得46分高踞聯賽榜首位。
祖記教練艾基利賽後就承認，今場波緊張到佢連12碼都唔敢睇：「我冇睇到C朗主射12碼，不過我之後會翻睇，今場係極難應付嘅一仗，一來我哋需要作客，二來我哋踢完歐聯後未夠三日就要踢呢場打吡，但我滿意球隊今場帶嚟嘅正面結果。」
意甲入11球並列射手榜榜首
C朗除咗成為都靈打吡嘅焦點之外，連同今場佢今季意甲已經射入咗11球，同熱拿亞嘅比亞迪克並列射手榜榜首。除此之外，C朗嘅入波亦含重要嘅歷史價值，事關佢今場就射入咗祖記歷史上第5,000個意甲入球，加盟短短半季就喺球會嘅歷史名冊留名，C朗嘅足球生涯果然注定成為傳奇。
祖記成為咗首支達到5,000個聯賽入球里程碑嘅意甲球隊，佢哋嘅兩支老對手國際米蘭同AC米蘭而家都只係得4,863球同4,645球，分別排第二同第三位。祖記射入第4,000球嗰陣已經要數到2003年，當時由意大利前鋒迪華奧所射入，至今已經經過咗15年喇。