區議會選舉明年底舉行，參戰區選其中一個陣地係業主立案法團，有意競逐連任屯門悅湖山莊法團主席嘅民建聯當區區議員張恒輝近日以四式欲取勝。首先佢喺業主大會舉行前收集已經寫上佢大名嘅授權票，仲喺收集授權書限期當日以議辦同法團名義大派手拉車，相信收穫唔少。
除此兩招，佢仲喺屋苑通訊hardsell自己獲深圳市寶安區政協主席大駕光臨悅湖，仲話連中聯辦人員同全國政協委員都有出席同佢開會，獲讚管理妥善，估唔到呢個都係賣點。與此同時有業主想入信去屋苑信箱呼籲參與業主大會竟然被拒，管理處話只得區議員同法團可以入信喎。
關注事件嘅民協當區社區主任黃虹銘話，只要有關資訊涉及屋苑管理問題，業主喺屋苑各座地下大堂派發資訊入其他業主嘅信箱並無不當，佢已去信溫提管理處，可惜對方未有回音。八方致電張恒輝了解，但佢話開緊會唔得閒收咗線。