公民黨噚日改選新一屆執委會，雖然領導層冇大變，但當年有份創黨嘅四大狀之一余若薇，今次就冇再參選執委會，即係話佢正式退出黨領導層，四大狀只剩番梁家傑仲留喺黨領導層做主席，當余大小姐交代點解唔再參選執委時候，身邊嘅「徒弟」陳淑莊（Tanya）激動到哭成淚人，場面相當感人。
四大狀僅餘傑哥
公民黨中人私下會叫余若薇做「大小姐」，除咗係對佢尊重，亦反映佢喺黨入面嘅地位。其實自從佢唔做立法會議員之後，雖然仲好關心時局，但亦逐步淡出黨務。噚日佢正式退出領導層，傑哥記招上向余大小姐送花致謝，祝福對方退下前線後生活愉快、身體健康，笑言：「我唔會畀佢（余）輕易甩身嘅」，又同余講：「唔好忘記公民黨啊！」余大小姐話唔會，一班黨友聽到，即拍手向余致謝，其間企喺余大小姐側邊嘅Tanya，更一度喊到收唔到聲，連傑哥會後都感觸話：「我頭先都差啲喊，因為余若薇（退出領導層）真係一個時代嘅結束，四大狀喺執委會剩番我咋！」
有黨友話，Tany喊得咁犀利係有原因，除咗因為近日面對佔中案官司壓力，佢亦諗起亦師亦友嘅余大小姐，當年同佢合組名單選立會嘅苦樂。余大小姐會上分享時話：「我覺得萬物有時，我由創黨到𠵱家，講緊係12年，都係一個幾好嘅數目，我見到公民黨亦都多咗好多年輕黨員，我哋執委嘅額只係得廿個，咁所以我覺得係時候退落嚟，讓一啲更加年輕嘅人可以加入執委，但唔等於我唔係公民黨嘅一分子，我依然係公民黨嘅普通黨員，公民黨上上下下，同好多發生緊嘅事，或者未來要做的事，你都會見我嘅蹤影」。陳淑莊此時一度破涕為笑，搭嘴話：「例如寫揮春。」
李八方