喺阿聯酋舉行嘅世冠盃周三正式開打，首場資格賽由東道主球隊艾阿恩（圖）迎戰半職業嘅大洋洲盃冠軍FC威靈頓，結果主隊喺落後三球下驚險追和，仲靠互射12碼後贏波晉級。FC威靈頓開賽11分鐘靠阿根廷中場馬里奧巴斯亞離門30碼轟入世界波領先；四分鐘後，艾朗卡歷咸單刀破網領先到2:0，44分鐘，FC威靈頓更由馬里奧里查再射入擴大比數到3:0；艾阿恩喺上半場補時階段，由日本外援鹽谷司入波追近到1:3。下半場四分鐘，艾阿恩由杜姆比亞飛身鏟射破網，追成2:3；踢到85分鐘，瑞典名將馬古斯貝治禁區內轉身抽射破網，終助艾阿恩落法定時間追成3:3完場，要加時作賽。兩隊加時未有入球，最終艾阿恩喺互射12碼以4:3險勝FC威靈頓，躋身次圈會同非洲代表突尼西亞嘅艾斯柏蘭斯爭入準決賽。