熱刺禮拜二晚喺歐聯分組賽作客逼和巴塞隆拿1:1，驚濤駭浪下以次名出線16強。早前曾經心臟病發嘅前英格蘭中場荷杜就講笑話，睇場咁嘅波對佢嘅康復係完全冇幫助。61歲嘅荷杜喺twitter發推文話「咁對我嘅康復真係冇好處，但係球員真係踢得好，甚至係值得贏波！」今次係荷杜自從上月底心臟病發之後，第一次喺社交網站出文。荷杜喺球員時代大部份時間都係效力熱刺，贏過兩次英格蘭足總盃同一次歐洲足協盃。