明年5月1日就係香港警隊成立175周年，警隊已計劃連串慶祝活動，頭炮就係明年1月12日、13日、19日及20日喺黃竹坑警察學院舉行嘅香港警隊175周年大匯演暨警民同樂日，除咗多個部隊表演同展示裝甲車等裝備外，亦加入科技元素，包括一齣講述警隊歷史嘅360度3D短片，參觀者要預先下載手機Apps「175AR」，就可以喺場內指定佈景板利用手機拍攝到飛虎隊或反恐特勤隊嘅VR影像。
後日免費派1.2萬張飛
警察學院副院長陳民德同八方講，同樂日為期四日，每日兩場，分別早上十點同下晝兩點，八場合共1.2萬張門票，市民可於後日早上八點半起到15個指定地點索取，每人免費限取兩張兼可以選擇時段，先到先得，平均每個地點會派發700至900張門票，警方呼籲市民千祈唔好炒賣，如果發現有不法活動會追查㗎。
詳情可以瀏覽 https://www.police.gov.hk/175a/tc/。