建制派陳凱欣正式做咗議員都有兩個星期，仲係唔多覺佢係議員，事關佢好似喺立法會冇乜講過嘢。
選舉捐贈疑似未計好
不過立法會有規矩係做咗議員兩個星期就要交利益申報，就喺噚日，陳議員首份利益申報上線喇！
曾經形容自己受颱風「山竹」啟示而參選，所以有「陳山竹」外號嘅陳凱欣，佢份利申真係好似被颱風吹過一樣乜都冇，受薪董事職位：冇、受薪工作：冇，咁相信大家好想知嘅選舉捐贈呢？四個大字：稍後提供。
咁又難怪嘅，政府都係規定候選人要喺選舉後60日內申報，加上建制派花咁多人力物力幫陳凱欣，話唔定佢條數真係有排計呢。唯一一項有啲嘢睇吓嘅利申就係物業，佢申報自己喺九龍區有物業囉。啱數嘅，佢自封為「城寨女孩」吖嘛，喺九龍有樓好合情合理。