多得建制派嘅教導，今時今日嘅社會就係你用乜就代表你支持啲乜，既然係咁，八方惟有睇真啲建制派用啲乜？最近興講華為，建制派就一窩蜂話要買華為、撐華為，但八方噚日喺立法會，為建制派議員同高官做盤點，只見唔少人都仲係撐美帝，最弊係連國家領導人、啱啱獲律政司放生嘅梁振英，都用蘋果產品，明明新民黨主席葉劉淑儀話呀，美國貨好危險喎，何解呢班議員高官，唔識驚嘅？
689有Pad有7又有X
工聯會陸頌雄話佢買咗部華為平板、民建聯劉國勳仲話用咗華為好多年，葉劉就特別買咗個華為手機做禮物，但八方噚日喺立法會所見，劉國勳嘅黨友黃定光、葛珮帆、鄭泳舜，仲有「突破界限」嘅建制派新貴陳凱欣，都係iPhone友喎，阿舜仲要一人兩部，罪加一等囉。反而平時唔算多發言嘅陳克勤同梁志祥，身體最誠實，冇用美帝產物。
特區高官又如何呢？政制局局長聶德權、同樣係民建聯嘅商經局副局長陳百里，又係iPhone友，八方問陳百里嘅時候，佢仲面有難色，話約咗議員開會，跟住雞咁腳咁走。據政府中人講，其實大部份官員，包括娥特都係iPhone友，有啲官就純粹貪華為影相靚，先至額外買多部嚟用。咁唔識分莊閒，有冇搞錯？
所謂上樑不正下樑歪，特區高官都搞成咁，一定係上面出事。睇番全國政協副主席梁振英噚日出席廠商會活動嘅時候，居然舉起咗部iPad，咁仲成世界嘅？八方仲記得2016年10月，梁振英喺facebook出po「證實」自己去咗中環IFC間Apple Store排隊買iPhone 7，到今年10月佢又喺facebook出長者圖，展示秋天嘅櫻花美態，仲寫明張相係iPhone X影嘅㖭，當時已經有網友回應叫梁振英試吓用華為，唔知佢𠵱家聽唔聽得入耳呢？
李八方
