作為無殼蝸牛嘅小記，每次見到新樓盤開售，各位金主大排長龍，都不禁望門興嘆，雖然樓市咁好景，但地產經紀為咗爭生意打架，仍然間中發生，求財唔係求氣，唔使搞到出拳頭啩？
市建局重建項目「凱匯」開售，呎價雖然高達1.7萬，但仍然被喻為「超級開心價」，設於尖東尖沙嘴中心嘅示範單位當然都備受注目，各地產代理都喺場外如臨大敵，務求做到生意。但係前晚（11日）7點幾，就有兩間公司嘅地產代理因為碰撞問題，初則口角繼而動武，仲打到出街㖭！
由地產代理周先生提供嘅片段見到，着白色外套嘅中年地產代理首先挑起事端，喺尖沙嘴中心嘈起上嚟，保安員見到即刻趕佢哋出去，點知呢個時候，白衫阿叔出拳打向着藍色恤衫嘅行家，攻勢仲非常積極，對方亦都有出手還擊，兩個保安員初頭只係喺旁邊食花生，但見到白衫阿叔越打越興起，其中一個保安員企咗喺兩名事主中間將佢哋隔開，並出言安撫。
行家：搵唔到食先會打交
周先生認識被打嘅行家，形容佢為人客氣，絕對唔會撩事鬥非，直斥打人嘅地產代理行為無聊、幼稚。入咗行四年幾嘅周先生承認，同行爭客打交經常發生，「通常搵唔到食嗰啲先會打交，等到躁吖嘛！」佢話行家嘅爭客伎倆，一般都係將個客包圍，或者以身體撞向佢哋嚇走個客，「佢做唔到生意，亦都要你做唔到！」周先生感慨，由於地產業入行門檻低，唔少質素差嘅人都可以入行，令到業界良莠不齊，直接破壞行業形象，「其實做嘢時碰撞好難避免，多數都係道歉就算，大家求財箒，唔使出手嘅！」
警方就話當日有接到報案，警員到場後打人嘅男子已經走咗，被打嘅姓陳（38歲）地產代理報稱不適送院檢查，警方將案件列作襲擊處理，暫時無人被捕。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。