曾經說過唔去台灣旅遊，因為驚喺酒店被偷拍出浴的葉劉，自稱明天便會放棄三星，買華為：「所有美國通訊器材都有被監察的危險，用自己國家的軟件和硬件會安全啲」。葉劉咁講，還以為係擲十億八億入股拎話事權，原來只係買機過手癮，既幫唔到公主甩難，亦洗唔到華為個底，淨係博到自己上新聞，搶先保安局長發言，抽晒水。華為公主呢一鋪，幾可斷言，必將應驗成龍金句「中國的，會爆！」葉劉換機一心做塘邊鶴，等住睇華為爆。以葉劉為首的愛國戰狼，輸畀愛字頭那些大媽，後者有工開，喊打喊殺叫美國佬滾出特區。但係觀眾唔畀讚喎點搞？是咁的，回應美加圍剿，愛國戰狼已經走到臨界點，唔hea得，必須聯合港澳台同胞，團結亮劍，反擊升級，燒自己保險箱裏的美加護照！無論手握三本抑或柒本，都要讓護照成灰，徹底向美加焦土報復！每人一張護照焦屍，微信上載，想學環時姓胡的老總，以i瘋上傳照片的話，必須了解內地已有機構下達指令，員工逢i必誅！一場華為引爆的IT大海嘯淹至，將外國護照說成是旅遊證件的過氣保安局長和那位劉二富公子，攬緊水泡，隱晦祈禱你部手機識得智能撲水與通水。