韓星朴信惠、陳凱琳、倪晨曦及陳柏宇太太符曉薇昨日出席尖沙嘴聖誕活動，正在陀B的陳凱琳，穿上吊帶裙到場，上圍明顯變得有睇頭，但她驚聞剛誕下女兒的符曉薇餵人奶後上圍勁升cup，表示要向對方請教谷奶之道。
符曉薇升8 Cup
上月宣佈懷孕的陳凱琳，身材明顯豐滿不少，她透露看着身材有不少變化，感覺很得意，又指重了十磅，但不確定上圍有沒有升cup。對於符曉薇產後上圍升cup不少，陳凱琳驚訝說：「等我問吓佢先，我應該冇咁嘅福份，都好嘅，因為陀BB時飲食營養好，我自己都希望餵人奶，因為對BB好。」
陳凱琳自懷孕後工作量大增，證明BB很旺她，她笑說：「好開心，老公話我可以分擔搵奶粉錢嘅壓力，佢成日提我活動完後一定要着番平底鞋，𠵱家每次到活動場地都要向佢報到，暫時只會留喺香港工作。」
符曉薇產後首次現身活動，她透露因為餵人奶關係，胸部大得誇張：「𠵱家好討厭自己個胸，最近去買bra，至發現變咗JJ cup，比之前C cup升咗8 cup，連sales都話好誇張。𠵱家終於明白媽媽辛苦，接受咗身形變化，見到BB健康就開心。」
朴信惠講新劇
朴信惠穿上粉藍色露肩連身裙現身，先以廣東話向大家打招呼：「大家好！我係朴信惠。」之後她透過繙譯表示來港感受到濃濃的聖誕氣氛，又指很想飲茶食點心及雲吞麵。朴信惠透露聖誕期間要補拍韓劇《阿爾罕布拉宮的回憶》，提到新劇收視高，她說：「今次電視劇是新題材，初初會覺得複雜，但發現是新挑戰，未來作品都希望有新嘗試。」
採訪：羅慧敏
攝影：沈健程