呢排成日有交通意外新聞，小記個心都好唔舒服，所以大家唔好嫌小記長氣，揸車要小心，命仔緊要！黃大仙呢位鐵騎士，上星期喺馬路自炒，好彩只係手腳輕傷。
一條相信由旅遊巴車cam拍到嘅片段，近日喺網上流傳，片中場景係黃大仙龍翔道，當時係周日（9日）下晝近5點，路上車流不絕，當去到斧山游泳池附近，畫面左邊一架電單車，突然間左右搖咗兩下，跟住就連人帶車翻側，電單車向前滑行十幾米，打側瞓喺馬路，車上物品同零件散落一地，一個疑似頭盔仲飛埋過隔籬線。呢個生死關頭，旅巴司機即刻煞車，上面嘅師奶嚇到嘩嘩聲！
網民鬧爆無人維修
「佢自己跣㗎！」「佢大命呀！」「好好運呀！」「司機好嘢！」師奶們七嘴八舌，精采嘅旁述比片段更加吸引，不過呢，各位大姐，出咗事呀，食完花生唔該搵人幫手報警啦！司機最後自己企返起身，好彩佢着住長衫長褲冇咁傷，不過見佢行路拐吓拐吓，睇來對腳都受咗傷，司機企圖移返正架車，唔知係咪整親隻手，最終都唔成功，見佢喺現場行來行去，唔知點算咁。呢個時候，有位相信係途經嘅駕駛人士行埋去，片段就告一段落。
網民睇完條片之後批評，現場附近路面凹凸不平，唔明點解冇人處理，亦有網民講笑話「條片好嘈」、「成車都係專家」。不過點都好啦，最緊要人冇事。警方指，電單車沿龍翔道往九龍灣方向行駛，其間因前車急停，電單車閃避期間失平衡自炒，姓關鐵騎士（35歲）手腳受傷送院。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。