「心浮氣躁會出事」𠵱句說話，無論係司機或途人同樣啱用，等多幾分鐘，唔會對生活構成乜影響，但分分鐘改變你嘅命運。旺角一架直通巴，噚日下晝將一名過路嘅枴杖老翁撞倒，仲捲埋落車底，老翁送院後情況危殆。
由網上圖片見到，戴住鴨嘴帽嘅老翁被撞後昏迷，趴咗喺旅遊巴前左轆位置，佢支枴杖留喺身邊，救護員到場之後，將佢送往醫院搶救，現時情況危殆。現場係旺角荔枝角道、鴉蘭街交界，下晝1點半左右，架中港直通巴沿砵蘭街往荔枝角道方向行駛，轉入鴉蘭街時撞倒路過嘅老翁，仲將佢捲入車底，身體被左前轆壓住。根據目擊者指，途人見到意外發生，即時喝停直通巴，並報警求助。
姓劉（71歲）老翁胸部及盆骨骨折，被送往醫院創救後，情況危殆，警方以涉嫌「危險駕駛引致他人身體受嚴重傷害」，將姓林（51歲）直通巴司機拘捕。