要做建制派向來唔係問題，問題係建制派好多時口講一套、做就另一套。有心做建制派嘅應該學吓新民黨主葉劉淑儀，葉太日前先至話會轉會去華為，噚日就坐言起行、買機救國，不過葉劉今次找數似乎未找足數，只算找咗一半，因為睇真啲原來佢唔係買嚟自用喎…。
去蘇寧買機
葉太喺美國人搞嘅fb度出po話，佢自己講得出轉會用華為，於是前晚去完活動就走咗去時代廣場（銅鑼灣嗰個，唔係美國嗰個）買華為，仲要一買就買部頂級嘅Mate 20 Pro。
話話時，買部電話啫，搞到要搵人同佢拍埋片咁隆重，真係相當之認真，證明愛國係唔講得笑。亦因為葉太拍咗段短片，可以睇得出佢係去咗大陸資本嘅蘇寧電器度買新電話，又係一項政治正確之舉。
葉太買完電話後，原本都諗住自用，但係佢靈機一觸，諗起自己用緊部韓國牌子嘅三星電話仲好地地，為免製造電子垃圾，於是佢又改變主意，決定將部華為捐咗畀新民黨，作為西方嘅聖誕節對做抽獎禮物。嗱，家陣買咗華為、但又唔係自己用，咁仲算唔算講得出、做得到呢？八方真係唔識判斷。
李八方