出得嚟行、預咗要還，今年年初民主黨搞黨慶晚宴，娥特現身撐場之餘仲捐出3萬蚊畀民主黨，搞到唔少建制派個心酸到呢。噚晚輪到經民聯搞黨慶晚宴，娥特又現身撐場，上次獻咗金、今次獻咩好呢？
經民聯貴為立法會內建制派第二大黨，佢哋尋晚搞六周年晚宴，特區高官梗係畀面現身啦。咁最畀面嘅好自然係娥特，當一班經民聯領導層上台唱《獅子山下》嘅時候，娥特亦獻身唱埋一份。大會拉得娥特開金口就梗係叫人捐錢。有份喺台上唱嘅恒地副主席李家誠相當豪爽，一口氣捐咗200萬，連同其他捐款，大會話娥特只係幫吓口唱嘅《獅子山下》就籌到1,200萬元。另外噚晚經民聯監事會主席林建岳亦宣佈咗個消息，就係工業界議員吳永嘉正式加盟經民聯，一入黨就做黨副主席。吳永嘉就話相信可以學到好多嘢喎。