2018年就快完結，相信遲吓又會有唔少乜乜大事回顧，而建制派第一大黨民建聯亦準備舉辦第六次年度漢字評選（圖）。有得選梗係好過冇得選啦，何況仲有獎品，頭獎仲係雙人來回日本機票㖭，係咪好吸引呢？係呀，你冇睇錯、八方亦冇寫錯，選漢字嘅頭獎係來回日本機票，真係相當有意思。
三獎先至送華為手機
民建聯早幾日就喺fb出po叫大家投票，網民相當踴躍，有「恥」、「賤」、「苦」、「鬼」等等。八方懇求大家唔好咁啦，民建聯搞選舉點會冇篩選呢，人哋一早篩咗10個字出嚟畀大家投票㗎喇，冇上述嗰啲字㗎，再者網民自己都話民建聯「無恥」，咁仲點解要選個「恥」字呢？
講番獎品方面，除咗頭獎係來回日本機票，二獎係雙人來回曼谷機票，到三獎先同祖國有關，係華為P20智能電話。咁樣就相當之唔愛國咯，應該調番轉，頭獎係華為電話、二獎去曼谷、三獎先去日本嘛。