近日氣溫驟降，小記提提大家，冇咩事就返屋企，唔好喺條街吹風呀！不過，西貢有位阿叔，不單止夜孖孖踎街，仲要踎正喺馬路，嚇到駕駛人士個心離一離，好彩無造成意外！
話說連先生前晚（9日）8點幾，揸車載女朋友由九龍入西貢食糖水，架車沿住清水灣道行駛，一直行車順暢，雖然近9點，話晒星期日，路上嘅車流都唔算少，由連先生提供嘅車Cam片段見到，當駛到近打鼓嶺新村嗰陣，連先生見到右前方有黑影郁吓郁吓，「初頭以為係垃圾，但後尾見佢識郁，以為係隻馬騮坐喺度」。
當越駛越埋嗰陣，黑影慢慢企返起身，嘩，原來係一位黑衣四眼中年男子，連先生畀佢嚇到心都離埋，架車當堂窒一窒，阿叔，你搞咩呀？「我冇諗過係污糟嘢，佢可能搵緊嘢啩！」由於清水灣道車速70公里，而現場又唔係行人過路處，所以途經嘅車輛速度都好快吓，「真係好不負責任，完全罔顧自己同司機嘅安全！」