【本報訊】慘劇中保母車司機疑未有拉好手掣，導致保母車衝下長命斜釀多人死傷，有專家懷疑肇事司機嚴重疏忽造成慘劇，提醒駕駛者在斜路泊車應做足安全四招，包括自動波車入P波、棍波車入後波（車頭向下）或前波（車頭向上）防止車輛溜前或溜後、拉緊手掣，扭軚向路邊，以及熄匙後拔走車匙。
利用波箱齒輪防溜前
汽車工業學會會長李耀培認為，慘劇是否涉保母車機件故障仍有待調查，但相信與司機嚴重疏忽有關，若他落車前做足拉緊手掣等安全措施，應該不致令保母車俯衝百米撞及多名途人。涉事保母車屬棍波車，李指若在斜路泊車，車頭向落斜方向，棍波車應入後波，利用波箱齒輪防止車輛溜前；相反若車頭向上斜方向泊車，即應入一波以防車輛溜後；若是自動波車則應入泊車的P波。
除了拉緊手掣和入波，若泊車在斜路左邊，司機下車前應先扭左軚；泊車在斜路右邊則應扭右軚，車輛即使失控亦只會撞向左右兩邊石壆及坑渠蓋，至少可阻擋車輛去勢。司機下車前亦要將車匙拔掉，因拔掉車匙後軚盤會鎖死。
工程師盧覺強亦估計今次意外是因司機未有拉好手掣，「冇可能完全冇拉（手掣），冇拉就已經即時溜前啦，可能拉唔緊，司機落車震一震，手掣就可能郁咗，咁架車就溜前」。
■記者黎國剛