年尾流流，殺出一隻灰犀牛！就係華為太子女被捕！事件令「習特會」成果得個桔，港股三日回吐過千點，失守上升軌，技術走勢轉差。不過，睇見中國官媒集中火力，向應美國要求作出拘捕嘅加拿大開火，而非發拘捕令嘅美國，似係想將件事同中美貿易談判切割。
話係灰犀牛，唔係黑天鵝，皆因華為被美國郁，其實預咗！灰犀牛係指發生機會率大而影響大嘅事件，黑天鵝則係指發生機會率微而影響大嘅事件。話說4月時，中興（763）違返美國對伊朗嘅出口禁令遭罰，內部文件爆出競爭對手「F7」亦有出口伊朗。「F7」者，華為也！
喺中國，行內慣以「F7」作為華為代號，「26」作為中興代號。「F7」諧音夫妻（Husband & Wife），英文首個字母，同華為（HuaWei）相同；「26」諧音「二流」，意思不言而喻。
美國基於國家安全又好，科技競爭又好，對華為、中興嘅電訊設備一向有戒心。事實上，由美國、加拿大、英國、澳洲、新西蘭共享國家安全情報嘅五眼聯盟（Five Eyes）中，只剩加拿大仍未表態拒用華為、中興。日本、韓國、印度、德國亦已說「不」。
講到中美角力，貿易係前哨戰，科技先係主戰場。中美科技戰，要由新一代互聯網通訊技術5G講起，5G速度比4G快10至100倍，喺科技、經濟、軍事上，都係兵家必爭。有輿論話華為嘅5G發展，令美國眼紅而出手圍堵。是耶？非耶？總之，中國5G外地受阻，唯有加快拓展內地。
上周五，內地5G頻譜資源配置方案終於拍板。中金發表報告，預計5G喺2019年試驗商用，2020年正式商用，鐵塔（788）明顯得益，皆因三大電信商基站需求將會大增；大和、瑞銀都睇好鐵塔。此外，鐵塔入圍港股通亦利好，周一即逆市飆3.2%。
割柑人
本欄逢周二刊出