華為手機呢排因為孟晚舟被捕熱爆香港建制圈，似乎已成表忠行為，用緊三星手機嘅新民黨主席葉劉淑儀率先預告將來要換手機都轉華為，讚呢間公司表現好要支持吓，同時話一定唔會用蘋果，「覺得唔係好安全」，仲話除非冇取代品，否則所有通訊器材都會盡量避免用美國貨，指從安全理由睇，「用所有美國貨都係危險嘅」，因為美國當局有權監察手機，用國產安全啲喎。吓，中國監聽消息時有所聞，葉劉唔通唔知？而查實佢都係美國史丹福大學出品囉。
據八方所知，建制圈內唔少人如政協委員同立法會議員喺孟晚舟風暴未發生前都係用華為，一來係支持「我的國」，二嚟據聞華為手機影相質素唔差，工聯會立法會前議員鄧家彪都係粉絲，有部工作用嘅華為，大讚「影相靚速度快」，另有部小米手機，形容價廉物美，兩部都唔係「外部勢力」，真係好政治正確，而現為政協委員嘅前保安局局長嘅黎棟國亦係小米用家，三個字形容：「平靚正」。