特區政府同中聯辦噚日合辦以「改革開放輝煌四十載，香港與國家同發展共繁榮」為題嘅研討會，單睇研討會主題……會唔會令大家有啲眼瞓？但特首林鄭月娥唔係冇貨交嘅，除咗話特區政府有責任完善憲法同《基本法》相關機制、參與國家建設外要維護國家安全，並繼續為兩地青年到內地發展鋪橋搭路云云，都有句嘢令大家叮一聲，就係佢話早前率團訪京獲國家主席習近平接見，而習對港人喺改革開放中作用充份肯定，「讓代表團成員如沐春風，到𠵱家仍然津津樂道」。
同場嘅中聯辦主任王志民致辭時提到，改革開放同一國兩制係兩大國策，又話大灣區同一帶一路發展為香港探索新路向，有力推動特區第三次經濟轉型，亦特別係青年實現個人夢想嘅現實路徑，繼而又指香港喺國家支持下，兩度戰勝金融危機同沙士。嘩，原來又sell國家救港。