小市民置業，必須注意有冇買錯凶宅，事關銀行不肯按揭，準業主隨時跣到攤攤腰。同道理，家長幫子女揀校，係咪應該都有凶校名冊做參考呢？家長再怪獸，冇人會將子女送去鬼門關。凶校害人子弟，雖然教育局唔會釘校，但家長有得揀，寧願捨棄所謂地區名校，留得子女青山在。所謂凶校，不一定校內發生凶案。但學生或者老師自尋短見，直接跟學校有關，後者必須開誠佈公，亡羊補牢。但現實中，從死因庭揭開的沉重事實中窺見的，是地區名校學生出事了，校方第一反應係推卸，先是老師說「我都唔識處理。」副校接口「去醫院都無用，時機唔適合。」講時機？係跳樓唔係買樓喎校長！副校一直擋架死者父母，負責打那個晚間奪命call，揚言記學生大過的訓導老師，一直龜縮，冇道歉！冇見人！難道訓導老師驚住鬼拍後尾枕？訓導老師與副校幾十歲人，對待一個逃課中學雞，淨識記大過，記大咗，卻不肯面對失誤，逃避家長，高薪低能！這種由老師兼任殺人凶器的所謂地區名校，令人信納整個管理團隊，已經選舉主任上咗身！對唔多聽話的年輕人DQ，冇選項！唔隱晦！（教育局硬性規定高官子女必須送去凶校領教吓，楊局長自認懶，凶校最啱懶鬼！）