紅遍網絡嘅「任何仁」，真係任何時候都會出場㗎喎！呢兩日天氣急速轉冷，唔少人都會攞返個暖爐出嚟用，但暖爐招致祝融之禍，時有所聞㗎喎，點樣先至暖笠笠得嚟又安全呢？估唔到全身膠質嘅任何仁，變身「暖男」獻妙法。
藍皮底下有隻錶
消防處喺facebook上載任何仁用暖爐嘅安全方法，包括任何嘢都要同暖爐保持適當距離、使用前當然要檢查一下，到底有冇壞機？而暖爐太耐冇用嘅話，可能會有塵積聚，所以用前必定要清潔機身。部份暖爐引致火災嘅意外，都因屋主用暖爐烘衫所致，所以任何仁都提醒大家千祈唔好試，記住要用獨立電掣，兼且出門時記得閂電掣。
但網民嘅反應，似乎有啲錯fo喎，唔少人留意嘅係任何仁藍膠皮膚底下原來有戴錶，紛紛問佢𠵱家幾多點（如果睇到的話……），唔通佢有透視眼？而任何仁戴住headphone睇書相，亦好多迴響，「對耳筒幾好喎，笠住對耳都聽到」。更多人則關心任何仁嘅安危，叫佢千萬切記，「唔好企咁埋個暖爐，因住熔咗件披……」，有人睇得更通透，叫佢凍就着衫啦，唔着衫開暖爐，好唔環保喎！
識睇睇留言
Lei Weng Ian：
咁嘅天氣淨着條波褲，褸都冇件梗係凍啦！
Ka Lai Wu：
仁哥唔好企咁埋個暖爐，因住熔咗件披。
Echeng Echeng：
凍就着件衫喇，打大赤肋開暖爐，咁唔環保！
Jeffrey Lo：
對耳筒幾好喎，笠住對耳都聽到。
資料來源：香港消防處fb
李八方