上周六澳職，排第三嘅上季常規賽冠軍FC悉尼竟然爆冷輸一場，主場對尾二嘅威靈頓鳳凰，上半場已經輸0:3，開出200倍半場波膽。鳳凰嘅基舒拿就威威，兩次攻破悉尼大門，今季已經累積到四球。至於尷尬嘅悉尼，就要去到完場前一分鐘先由米高蘇路破蛋，但輸1:3都好樣衰，加埋兩周前輸1:2畀墨爾本勝利，主場已經兩連敗。
同日另外兩場波就好正路，榜首嘅珀斯光輝同次席嘅墨爾本勝利一齊攞足三分。光輝靠伊高路美迪斯一箭定江山，主場以1:0贏最後得番10人應戰嘅墨爾本城；勝利喺另一場就以2:0輕取阿德萊德聯，今季新加盟嘅瑞典前鋒托禾倫係其中一位入波功臣，由於兩隊都贏波，賽後繼續維持兩分差距，而且因為勝利贏阿聯，令到同分嘅FC悉尼繼續以些微嘅得失球差優勢保住第三。