西甲上周六早場喺夜晚八點開波，周中要踢歐聯嘅馬德里體育會，主場對艾拉維斯開波踢到25分鐘，就由克羅地亞前鋒卡連歷接應辛迪亞高阿里亞斯右路傳中，用大腿撞入領先，呢球波亦係呢位今夏由AC米蘭過檔嘅前鋒，取得嘅第一個西甲入波。馬體會之後一直踢到下半場82分鐘，先再由基沙文喺一次反擊中，半單刀下建功，加上完場前一分鐘洛迪卡斯簡迪錦上添花，最終輕鬆地大勝3:0。另外，教練施蒙尼傳統上每年都會送聖誕寄語畀班球員，今年佢就用第二次世界大戰時期英國首相邱吉爾嘅名句，寫住「悲觀主義者喺每次機會中睇到困難，樂觀主義者就喺每次困難中睇到機會」，希望班球員樂觀面對嚟緊比賽，先有機會爭奪冠軍。