本身已經係意甲擂台躉嘅祖雲達斯，今季簽入基斯坦奴朗拿度（C朗）之後，其實都唔止淨係靠C朗食糊，上星期五意甲國家打吡C朗冇波入，不過仲有中鋒文迪蘇傑一個插水式頭槌頂入，幫祖記主場1:0險勝國際米蘭，開季15輪只係失兩分，以14勝1和追平5大聯賽最佳紀錄之餘，C朗今季冇波入嘅七場聯賽，祖記一樣係全勝！
祖記同國際一向係世仇，不過近年戰績就冇得比喇，今場係C朗第一次踢意甲國家打吡，亦係佢失落金球獎後嘅第一場波，祖記繼續踢4-3-3，C朗打箭頭，由保羅戴巴拿同文迪蘇傑支援，不過C朗全場四次起腳射門，只得一次中框冇波入。祖記就靠66分鐘，文迪蘇傑插水式頭槌頂入，祖記就咁主場一球小勝國際。
15場擸43分睇齊PSG
祖記今季喺意甲踢15場得14勝1和，以43分排榜首，追平咗上輪巴黎聖日耳門（PSG）所創造，喺三分制時代以來歐洲五大聯賽頭15輪嘅最高得分紀錄。另外，今場係C朗登陸意甲之後，第七場食白果，不過原來全部祖記都能夠贏波（見附表），反而唯一失分嘅賽事，主場1:1和熱拿亞，就係由C朗開紀錄，目前祖記入嘅32球，有10球由C朗攻入，只係佔31%，所以見到祖記對C朗嘅依賴，應該就比佢嘅舊東家皇家馬德里少啲，不過聯賽成績就更加一枝獨秀。
艾基利大讚文迪蘇傑
教練艾基利就大讚文迪蘇傑好使好用：「佢係嗰種畀佢休息一日，佢就可以回復體能，而且令場波變得唔同嘅球員，贏咗呢場波之後，我哋知道唔等於捧盃，我哋仍然會極力喺所有賽事保持不敗。」祖記今季嘅進步唔止鋒線，後防都有提升，邦路斯回歸之後，夥拍基亞連尼嘅中堅組合夠晒穩陣，後者今場有3次攔截同6次解圍，令到國際隊長莫路伊卡迪踢足全場，連一次射門機會都冇。