上周六日職上演升降班附加賽，由日職第16位嘅磐田山葉迎戰喺升班附加賽脫穎而出嘅東京綠茵。最終磐田山葉以2:0力克對手，下季可以繼續留喺日職比賽，但東京綠茵就自2009年降班以後，再一次錯失成功衝日職嘅機會。
今仗磐田先收起老將中村俊輔，但另一位老將大久保嘉人就擔正。比賽都係以主隊磐田較為主動，不過幾次射門都過唔到發揮出色嘅綠茵龍門上福元直人。但去到上半場39分鐘，呢位門將棄關出迎撲跌咗磐田嘅小川航基，球證直指12碼。呢位磐田前鋒親自操刀一射中鵠，成功為磐田打開紀錄。
易邊再戰後，綠茵嘅攻勢明顯加強，不過外援前鋒幾番射門都未有中龍。更慘情嘅係去到80分鐘，磐田嘅中場田口泰士再射入禁區外罰球，最終亦以2:0擊敗對手，成功保住日職位置，相反綠茵下季就繼續要喺日乙比賽。