曼聯領隊摩連奴嘅超級經理人文迪斯上周五罕有發表聲明，強調紅魔鬼對摩佬嘅領軍感到非常滿意。曼聯今季表現令人失望，𠵱家遠遠落後榜首同市宿敵曼城。紅魔鬼今季成績咁曳，自然令摩帥壓力日增。不過，超級經理人文迪斯就話曼聯仍然支持摩佬。文迪斯透過旗下公司所發表嘅聲明指，「有關摩連奴將離開曼聯嘅謠言係唔正確，佢喺奧脫福非常開心，球隊亦都好滿意佢。摩連奴同曼聯仲有一紙長約，佢堅決要建立一支足以贏得錦標嘅球隊。」同一時間，西媒有吹水料，話摩連奴有機會返皇馬咁話，可信程度就較低喇。
值得留意係，文迪斯過往甚少會咁樣發表聲明，但佢呢份聲明出嗰陣，同日正好有傳媒報道，指曼聯密謀出年夏天以𠵱家執教熱刺嘅普捷天奴取代摩佬，但普帥就話喺熱刺好開心。