今個星期開快車嘅唔只英超，原來英國嗰邊班女足都有波踢，其中有場曼城女足對錫菲聯女足嘅女子超級聯賽盃分組賽，賽前就掀起紛爭，令人感嘆女子足球員真係難撈，亦唔怪得有好多人中途放棄。
錫菲聯總經理擦曼城鞋
同曼城女足班全職球員唔同，錫菲聯女足大部份只係業餘，因為平時聯賽係星期六或星期日上演，所以唔影響佢哋返工，但呢場盃賽安排喺平日就麻煩喇，因為佢哋好多都返緊工，所以起碼有五到六名一隊球員，因為返工而冇辦法隨隊出戰。
錫菲聯女足領隊不滿英足總冇認真考慮佢哋嘅情況，仲要安排場波開夜晚七點，對手又唔肯讓步，話時間已出同埋波飛已經賣緊，所以點都唔會改時間。不過，由錫菲去曼徹斯特都起碼要個半鐘車程，令佢哋行程好匆忙，而且最衰係球會個總經理，明知球員有困難，竟然為咗擦足總同對手鞋，舉手同意開賽時間，搞到錫菲聯領隊生蝦咁跳。最後場波當然係大炒格，曼城送咗六隻光蛋畀錫菲聯。
港腳打工冇得踢東錦外
好似錫菲聯呢啲女子足球哀歌，其實喺香港都有發生，仲要係一件好平常嘅事。喺英格蘭，最頂級嘅女子足球員都係職業嘅，但喺香港踢波嘅女仔，就算係港腳同班霸主力，好似港女足隊長陳詠詩咁，本身都要有一份正職先可以維持生計，所以平日練波多數都係喺夜晚，好多球員都係收工後食個快飯就趕去球場。
喺香港踢甲組，又唔似喺英格蘭咁要去唔同城市作客，遠極都係湖山同寶翠等等，都叫做喺香港入面。但係要代表香港出外比賽就唔同講法，好似今年咁，港女足特別多賽事，有啲主力真係唔夠假期，早兩日先喺關島踢完嘅女子東錦外，真係有主力因為呢個原因而去唔到㗎！不過，就算踢職業又點？早前金球獎頒獎禮獲頒最佳女子足球員嘅希格堡，俾頒獎嘉賓疑似性騷擾咁問佢識唔識跳扭臀舞，好似好輕視女足呢份職業咁，就知道女子足球條路幾難行。