巴塞隆拿星期三喺西班牙盃32強次回合，雖然收起咗幾乎所有主力，不過仍然喺魯營以4:1大破丙組仔利安尼沙，兩回合計贏5:1殺入下一圈。
由於巴塞首回合作客已經贏1:0，教練華維迪今場正選就排出「面目全非陣」，正選只有拿傑迪錫係一隊常規球員，兩大王牌前鋒美斯同蘇亞雷斯就樂得喺觀眾席做湊仔公，兩個都抱住乖仔坐喺大髀，邊食熱狗邊睇波，幾鬼爽。
巴塞今場喺18分鐘就由蒙尼亞艾哈達迪開紀錄，加埋丹尼斯蘇亞雷斯同馬爾甘喺26同43分鐘分別建功，完半場已經領先三球。雖然利安尼沙喺54分鐘破蛋，不過丹尼斯蘇亞雷斯70分鐘入多粒，結果幫巴塞輕鬆大勝一場，兩回合計贏5:1殺入西盃16強。