賭王何鴻燊兒子何猷君擔任首席營銷官（CMO）嘅內地數碼娛樂平台創夢天地（1119）噚日上市，23歲就做上市公司高層，咁高興當然獲全家動員支持，除咗有媽媽四太梁安琪同阿哥何猷亨之外，較少出席公開場合嘅婆婆，即四太媽媽梁玉珍都現身支持乖孫。
四太全程低調
可能唔想喧賓奪主，蓋過公司三位創辦人陳湘宇、關嵩與高煉惇嘅風頭，四太全程好低調，只喺台下默默望住銅鑼，幫興奮笑唔停嘅乖仔影相。
猷君之後就喺微博貼文講感言：「小時候無數次夢想這一刻，我以為我會有很多話想說。但到了這一刻，我只想說，謝謝！」
不過，創夢天地噚日嘅股價認真唔畀面，要潛水，而且係同日掛牌三隻新股中，表現最差。四太持有創夢天地1%股權（約1,270萬股），賬面值已蒸發了724萬元，不過對四太嚟講，簡直濕濕碎。
李華華
mailto:[email protected]