好多人都知道有龐大資源嘅建制派喺派蛇齋餅糭方面相當出色。之但係派嚟派去咁耐，派嗰個唔悶，收嗰個都厭喇！有見及此，屯門區議會主席梁健文相當有新意，直頭派「車」㖭！不過梁健文派嘅當然唔係私家車咁大手筆，只係一般手拉嗰啲買餸車。之不過佢一係就唔派，一派就係幾百架咁，用大貨車運去屯門湖景邨派。
每架成本最低逾90元
八方問過喺當區做社區主任嘅周啟廉，佢話架大貨車噚日朝11點就到，搞到下午兩、三點先派。派手拉車其實唔算係首創嘅，N年前西貢區議員方國珊都派過，不過周啟廉就話梁健文唔單止派車㗎，之前仲派過花灑、燈膽、水龍頭之類家居用品。
八方都搵過梁健文了解吓，可惜冇回音。周啟廉就話佢上網睇過，一架手拉車平極都要90幾蚊，佢真係冇咁叠水可以派90幾蚊一份嘅禮物，但佢會憑服務取勝，例如街坊想拆咗手拉車上梁健文嘅招牌，佢幫手拆，更重要係自從佢喺當區做嘢後，梁健文派嘢都多咗，難怪佢話有街坊都同佢打氣啦。