威權管治下，連外訪都要講權威？特首林鄭月娥係咁諗㗎，但即將應邀啟程訪美，反映香港「一國兩制」真正落實情況嘅公民黨法律界議員郭榮鏗（Dennis）冇受娥特影響，準備充足以便向當地政商界「講事實、講道理」，亦希望美方保持香港嘅獨立關稅區地位。
而大家平時見到官仔骨骨嘅Dennis講起法治好嚴肅，查實佢都有輕鬆一面，同唔少人一樣都係《男兒當入樽》嘅粉絲。早前《蘋果日報》隨報附送《入樽》海報，Dennis都有買報支持，仲將海報放喺立法會辦公室，珍而重之。咁仲唔止，原來佢office仲有套《入樽》漫畫，亦有《入樽》主角櫻木花道為封面嘅畫冊，全部都係佢嘅心肝寶貝；自細鍾意打籃球嘅Dennis一講《入樽》就興奮，霎時變咗個大細路。