最近天氣開始轉涼，相信少咗人去船P，不過都係時候提醒吓大家去船P嗰陣要注意嘅嘢。唔少人出海玩，都會玩一種好似香蕉船嘅水上活動，大家又知唔知萬一大吉利是，坐香蕉船出咗事要做啲咩呢？
民建聯周浩鼎噚日喺立法會問咗條有關香蕉船嘅書面質詢。佢話家陣啲船主租水上電單車畀人玩係要攞牌，但係拖隻香蕉船呢類充氣式非機動船隻畀人玩就唔使喎，咁又使唔使問政府批呢？而萬一出咗事係咪一定要向海事處通報呢？
根據運房局嘅答案就係，啲船主想拖隻香蕉船畀人玩，的確係要得到海事處長批准，否則最高罰5,000蚊，而一旦隻香蕉船出咗事，亦要喺24個鐘頭之內以書面同海事處講，包括時地人等等，否則最高罰1萬蚊。而睇番2012年至2017年呢5年內，未試過有船主遇事不報，但係就有5宗非法拖香蕉船。照咁睇香港啲船主都幾乖，跟足規矩嘅。