日職球隊神戶勝利船日前宣佈簽入前巴塞隆拿前鋒韋拿，呢兩日又傳出佢哋想簽埋另一位曾經效力巴塞嘅西班牙中場法比加斯，睇嚟呢隻勝利船真係想變日本巴塞喎！雖然日職球隊普遍開出嘅薪金條件都唔夠中超高，但唔少外援都會選擇去日本，好似今年加盟名古屋鯨魚嘅巴西前鋒祖奧，就猛踩中國環境差，喺日本生活就好舒適咁話。
搵法比仔組狂牛三「船」長
據日本傳媒報道，法比加斯今季喺車路士不受重用，加上季尾就會約滿，所以神戶已經發出邀請，希望佢考慮去神戶同恩尼斯達同韋拿再次拍檔。話晒法比仔都仲當打，加上早前意甲嘅AC米蘭同西甲嘅馬德里體育會都傳出對佢有興趣，唔知恩尼斯達同韋拿又會唔會做中間人，嘗試說服吓法比仔過檔呢？
上季日職就有恩尼斯達同費蘭度托利斯加盟，令呢個沉寂咗好耐嘅聯賽再次受到關注，日職賽會亦都變通得好快，立即研究改革外援制度，鼓勵各隊簽入國際球星，提升比賽水準。日職喺上個月就正式通過，由下季開始取消每支球隊嘅外援登記上限，而外援出場人數亦由上季嘅3人增加到5人，相信好似神戶呢類富豪球會喺呢幾個月都會繼續積極買星喇。
祖奧︰中國生活好辛苦
雖然喺日職嘅薪金肯定唔夠中超同中東咁高，不過日本嘅生活環境同文化就的確一流，所以日職近年成為咗唔少球星嘅落腳地。鯨魚前鋒祖奧喺2016年曾經效力過中超嘅江蘇蘇寧，佢就話中國又大塵空氣又差，喺嗰度生活好辛苦，相比之下日本係佢生活過最舒適嘅國家咁話。所以話，一個地方嘅聯賽對球星嘅吸引力除咗足球水平同錢之外，生活環境都好重要㗎。
日職越來越多球星登陸，大家有冇考慮飛過去睇波呢？日職早排就試過將門票全面電子化，第時入場就再唔使揸住張實體飛，只需要用特製嘅智能手帶喺閘口「嘟一嘟」就入得場，呢款智能手帶唔單止可以用嚟入場同埋小額交易，佢嘅購票系統仲可以杜絕「黃牛飛」嘅炒賣情況㖭，日職賽會計劃喺2020年就會推行全面電子化，到時入場睇波就更方便喇。