【黑鏡線索】
前排介紹新書《It Doesn't Have to Be Crazy at Work》時，提到公司文化，主要係用粗粗哋嘅規矩嚟令大家至少大概向住同一個方向進發，以免努力地唔覺意互相抵銷。而呢啲規矩，寫低先當真。
傾完唔寫低 會變羅生門
要寫低佢，聽起上嚟好廢話。但自己經驗，文字呢個人類史上最重要嘅發明之一，實際上大家唔係用得咁多。唔用，我估係條數計唔掂。記低嘅成本，就係要花時間，而益處係未來可以睇得番。對於明知自己記憶有問題嘅人，例如Christopher Nolan套成名作《Memento》（凶心人）裏面嘅主角，會非常着緊將啲嘢記低佢，寫到成個身都係。但正常人類普遍高估自己未來嘅記憶力，咁結論當然係，咁得閒坐喺度寫嘢，不如快啲搞掂收工好過。
當我哋公司開始唔容許倚賴口述歷史之後，第一個問題係，有乜嘢值得記低？換句話講，有乜嘢值得講清講楚？明顯就係，未來越有機會成日用到，而又越多同事會用到，而用咗個影響越大嘅嘢，就值得溝通。跟住就會發覺，應該溝通嘅嘢，原來平日好少講，甚至完全冇提過，一來經常重要事讓路畀緊急事，二來仲以為呢啲嘢，例如其實間公司或者產品背後嘅定位係乜，其實我哋假設顧客有乜痛點我哋幫手解決，等等等等，大家心照啦。結果當然唔係。
所以決定要寫低重要嘢之後，第一個得着，係重新發現有乜嘢係重要，第二個得着，係終於老老實實咁抽時間去傾呢啲重要嘢。但係如果傾完之後唔寫低，係廢嘅，因為隨住時間，大家實唔記得，然後變成羅生門，要開會去傾上次開會到底有乜結論，之後不斷重複輪迴。寫低，係等未來嘅人有個所謂source of truth，未來嘅人包括新同事，亦都包括未來嘅現有同事。當你假設每個人嘅記憶衰退周期係得三個月，三個月之後會self-destruct，就會明白點解傾完唔寫低係恐怖嘅一件事。
若唔識寫字 就手機拍片
另一種值得記低嘅資訊，係示範說明。好多時，點樣完成一個程序，點樣用邊個工具等等，係要麻煩另一位同事口述傳遞，而呢類資訊，我哋就抄咗一位朋友嘅公司做法：拍片。如果屬於電腦操作，就screen record，如果電腦以外，就攞部手機出嚟拍。寫字好多人話唔識，而且停低手頭工作寫字又要花額外時間。但唔識字，都識用手機拍片啩，唔得閒，咪下次做嘅時候順手拍埋，根本冇唔做嘅理由。叫同事將重複做嘅動作拍低，一個月之後，公司嘅片庫，應該已經頗齊。
如果公司好少人呢？係咪唔值得記低？我都曾經咁諗，直到有一次我睇番自己兩個月前記低嘅嘢，當堂標冷汗，發現原來我已經唔記得一半，於是決定，以後唔好計縮數，就算得一個人，已經值得做，因為未來嘅人，包括埋自己。
撰文：宋漢生