天文台早前預告星期五氣溫會顯著下降，下周日及周一仲可能低見12℃，唔少人都預備定頸巾大衣保暖。而噚日立法會內，八方就見到公民黨陳淑莊（Tanya）喺會議廳外密密織溫暖牌頸巾，唔通面臨政治檢控嘅佢，又要為寒冬做準備？Tanya解釋，勤力密密織係因為上星期六社民連嘅12周年會慶兼籌款晚會，有善長用1.8萬元投得佢親手織嘅愛心頸巾一條，所以佢要加快趕工，準備聖誕前交貨。
原來Tanya嘅織冷衫技巧，係由佢婆婆同媽媽傳授，佢話細個不時見阿婆織冷衫，有乜嘢唔識都會請教佢哋。
兩日織咗40吋
雖然對上一次織冷頸巾已經係10幾年前，不過重新上手都冇生疏，兩日已經織咗兩嚿毛冷約40吋，佢仲可以一邊織一邊同八方傾偈㖭。
織頸巾最難係乜嘢呢？Tanya話唔係編織技巧反而係唔夠毛冷，佢原先預計只需要四嚿冷，但織織吓先發現原來唔太夠，去毛冷舖補貨時先發現賣斷市，所以𠵱家要朋友幫手睇吓可唔可以再搵多一至兩嚿毛冷，否則頸巾可能就會唔夠長。佢仲叫八方幫手，呼籲讀者如果有草綠色混色毛冷，可以出讓畀佢，又笑稱呢兩日因為織頸巾所以少咗出夜街，𠵱家人如其名做到「賢淑端莊」咁話喎。
李八方