97歲賭王何鴻燊有四房共有17名子女，二房子女感情好好，何超鳳說：「計樣子，我最似爹哋，同猷龍都好似樣。」何家靚女多，超鳳眼中最靚女又是哪一位？「大家姐梗係最靚啦！不單止係靚，係最靚，佢喺唔同歲數都有唔同嘅一面！」
大家姐何超瓊要求高
超鳳：細個時，佢係話晒事，好關心我哋，比媽咪對我要求更加高。入公司後，我哋並肩作戰好多年，好少嘈交，嘈一兩句就冇嘢。
三妹何超蕸好啱Key
超鳳：我哋一齊喺羅省住咗兩年，互相照顧，一齊出嚟蒲，一齊煮飯，𠵱家好多嘢都同佢係啱key啲。
四妹何超儀小霸王
超鳳：佢每齣戲我都有睇，佢由細到大都獨特、自我啲，少少小霸王，爹哋好錫佢。佢好捱得，為咗自己理想真係肯去博去做，呢樣我真係好尊重。
五弟何猷龍好乖仔
超鳳：佢細個時，我哋出街會帶埋佢，佢係好乖嘅細路仔。𠵱家佢好勤力、好用心做事，好錫屋企，有一個咁嘅細佬，我好驕傲。
更多精采時尚內容，盡在 http://add.appledaily.com。