金屬有價，唔少不法分子偷鐵、偷銅線變賣，但估唔到鋁梯、手推車都唔放過，偷完仲即刻轉手賣畀屋邨清潔阿姐，令阿姐無啦啦變咗接贓。一位工程人員上星期四喺葵盛西邨做嘢，只係停低部貨車一個鐘，返轉頭已經發現原本放喺車尾嘅鋁梯、手推車不翼而飛，真係嬲爆！
由貨車嘅車cam拍攝片段見到，兩名中年分別着牛仔褸同灰藍色外套嘅男子途經車尾時眼望望，之後喺附近徘徊咗陣，似係留意有冇人經過，確定附近冇人之後，兩個人即刻行近車尾位置，見佢哋踢住拖，一身街坊裝，似乎係附近居民。
牛仔褸阿叔一馬當先行埋去，一手擸起把鋁梯，之後兩人合力將佢拉出車外，片段清楚見到，牛仔褸阿叔身形瘦削，面都凹埋，而另一位阿叔，竟然喺20℃之下着羽絨。擸完梯都未夠，牛仔褸阿叔抬走埋部手推車先走人，兩個人分工合作一人搬一樣，向邨內方向離去。
清潔阿姐無辜接贓
車主朋友鄧先生話，朋友係工程公司判頭，當時上晝9點半喺葵盛西邨泊低架貨車去泵房做嘢，點知大約一個鐘之後返轉頭，發現車上嘅工具不翼而飛，事後拎住條片問邨內保安員，對方一眼就認出佢哋，話佢哋係活躍區內，懷疑染有不良嗜好，事後仲將賊贓以超低價200蚊左右賣咗畀清潔阿姐，但因為朋友唔想阿姐因為接贓而俾人拉，所以最終冇報警，「真係好離譜，光天化日下都咁做！」雖然朋友唔想搞大件事，但鄧先生睇唔過眼，所以將條片公開。
葵盛西邨區議員劉美璐話，今年8月至10月，邨內先後發生3宗儲物室爆竊案，警方最近拘捕一名男子，但無收到市民其他爆竊投訴。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。