如果好記性的話，大家都記得之前內地有人寫文，話香港打低外國大鱷抵抗金融風暴，全因為中國支持，好多香港網民大鬧歪曲事實之餘，仲話內地人抱恩主心態，乜都係佢哋威晒，估唔到呢種恩主心態香港一樣有人有，呢個就係元秋蔣麗芸，不過佢今次就係鬧美國人忘恩負義，忘記冇咗中國，美國邊有得經濟復蘇咁話！
網民︰冇美國 中國入到WTO？
蔣麗芸前日喺facebook上載一條內地學者張維為短片，片段中，張維為話喺2008年金融海嘯期間，當時美國財長保爾森到中國求助，要求中方購買美國國債解美國燃眉之急。
蔣麗芸喺帖文寫道：「2008年美國面對經濟危機，中國出手相救而令美國得以抒（紓）緩，但當美國經濟略有復蘇即忘恩負義。今天美國經濟如履薄冰，危機隨時再現，到時我們還能幫嗎？」
不過好多網民睇到之後即時反擊，有人話當年冇美國人幫手，中國可以咁易入到WTO咩？入唔到WTO，習近平今日可以有咁多錢玩一帶一路？仲有網民話，中國買美債係投資，美國有債息畀中國政府，美債更係世界最穩陣投資工具，對中國自己發展亦有幫助，冇得話係中國幫美國，更拉唔到乜嘢忘恩負義。
李八方