法國球王施丹上周六起應邀來港出席品牌活動，如果唔係特登去捧場，相信都好難見到呢位球壇巨星，估唔到一班青年民建聯成員卻有幸遇上施丹，當然唔執輸影相集郵，但據知呢位球王最初唔多樂意，無理由係因為同民記有不同政見？
話說青民主席、觀塘區議員顏汶羽噚日喺尖沙嘴嘅一條天橋同青民成員拍宣傳短片期間，拍拍吓離遠見到一堆人，好大陣仗咁出現。八卦係人之常情，顏汶羽自不然望多兩眼，「覺得熟口熟面……咦，真係施丹喎，咪膽粗粗主動上前影相囉！」
可能始終係巨星，影相方面未必想咁隨便，顏汶羽話當時施丹似乎「唔係好想咁」，之後在場職員話影一張啦，終於先至成功集郵。顏汶羽係足球發燒友，佢對「施丹轉身」無限讚嘆，唔知有冇學到出神入化？