話都冇咁快，台灣地方選舉塵埃落定，國民黨勝選後，北京立即變臉，第一步係韓國瑜去廈門開會，然後柯P去上海交流，當蔡英文死嘅，以後兩年，蔡英文行政命令出唔到總統府，行政院長賴清德與總統府秘書長陳菊兩來自台南高雄，而今民進黨保台南，失去高雄，陳菊必然失勢，而蔡英文須倚賴賴清德（59歲，一頭烏髮令佢貎似四十幾歲），故此賴清德陳菊為競選失敗負責請辭，蔡英文不得不挽留。
但蔡英文已徹底成為跛腳鴨，15縣市遭國民黨把持，中央與地方政府僵持不下，以後兩年台灣成為美國式政治gridlock，一無足觀，各方焦點一定係聚焦於韓國瑜，睇吓呢位光頭硬漢（與賴清德相映成趣）有何能耐。韓國瑜口口聲聲講打拼經濟，現在係佢show time，點表現呢？韓國瑜公開講，高雄要打破重重障礙，要「條條大路通發財！」香港若有政治人物講一句條條大路通發財，擁抱大富豪（台灣郭台銘）嘅話，必定噓聲四起，但高雄人目前大拍手掌，可見競選前韓國瑜講高雄又窮又老，並非亂噏。
香港人去台灣旅行，或者移民，經常稱讚台灣生活平靜舒適，有人情味，原來都未夠貼地，在表面風情之下，台灣人平均工資低，缺高薪職業，白領得個捱字，藍領驚工廠搬往大陸，觀光業愁大陸客不至，農民埋怨農產品市價低，市道淡靜，廠家商人則受大陸民企步步進逼，生存不易，只有新竹科學工業區有啲亮點。長此下來，台灣經濟必然陰乾，大學畢業叻仔叻女去美國留學之後，盡可能不回台灣。因是之故韓國瑜深切了解民間苦況，參選少談政治口號，一味講發財搵銀，看似俗不可耐但慘得過選民聽得入耳！呢次選舉大勝，並非國民黨特別關照，而係韓國瑜利用國民黨之招牌參選而已。韓國瑜與國民黨之關係似係特朗普與共和黨之關係，互相利用，但互不關心。
好咯，北京有反應，預料到高雄之陸客團在明年初會大幅度增加，帶旺市集攤販與旅遊巴士、食肆，呢啲雖是低增值行業，但表面人氣旺盛，高雄可見得到「繁榮景象」，有麻醉作用，高雄要發財咩，北京既然送錢畀一帶一路都咁疏爽，送高雄「統戰費」更不在話下！高雄與香港目前係一個只講發財，少談政治嘅現實世界，泛民想贏下次大選要有發財思想準備！