迪士尼噚日請咗一班童聲合唱團，齊齊唱歌仔同大家提早賀聖誕。負責帶同學仔唱歌嘅原來係今年讀心光學校五年級嘅合唱團小隊長黃凱霖。凱霖患有先天性小眼球症，加上視網膜缺損，細細個已經被診斷為中度低視力患者，黃媽媽話凱霖醫學上已經被界定失明，回想當初湊佢，BB又唔識講自己有咩唔妥，最慘係從來都冇諗過帶寶貝女出街，外人望住自己嘅BB，眼光原來好似望住怪物咁，搞到做媽媽嘅幾鬼心痛。
雖然凱霖冇咗大部份視力，但佢有一把靚聲，讀一年級嗰陣已經被老師招攬佢入合唱團，唱咗五年𠵱家做埋小隊長，可以教導新嚟嘅同學仔唱歌，佢大個仲希望做到音樂老師㖭。趁今日係國際復康日齊齊關注傷健共融，八方都祝福凱霖心想事成。