有人一見到民協黃虹銘（Ian）就會諗起張敬軒，可能因為大家都眼仔睩睩，Ian承認唔少人覺得佢似軒仔，但自己就唔多覺。呢位90後還記得櫻花正開，更記得煲呔搞嘅政改起錨運動，如果冇此一役，未必踏上從政路甚至走入法律界。
睇返履歷，確係民協「異類」。1990年出世嘅佢兩三歲跟家人移民澳洲，1996年舉家回流，佢喺深水埗嘅小學讀小一，「小一第一日返學，工作紙要寫姓名、班別、學號，我唔識寫，忍唔住喊」；最初中文默書係災難，「溫咗好耐都冇隻字啱，零分後又罰抄」，最終捱過咗，升去銘賢讀中學。
靠煲呔「激勵」踏上從政路
Ian形容中學時代成績唔標青，結果家人送佢去美國威斯康辛大學麥迪遜分校留學，原本讀經濟，點知2009年，當時嘅特首曾蔭權搞起錨運動推政改，忽然令呢位本來唔鍾意政治嘅𡃁仔開始重視原居地嘅問題，咁啱讀咗類比政治後「攞到大學生涯第一個A喎」，之後想喺香港政圈發展，而政治與法治分唔開，最終政治科學及經濟雙學士學位畢業後，返港喺中大讀法律博士仲完成埋PCLL法律專業試，正式成為執業律師。
點解讀law唔入公民黨？Ian話阿嫲搵過民協求助，自己又鍾意揼石仔做地區工作，「公民黨已經有好多專業人才，與其錦上添花，不如雪中送炭」，最終膽粗粗闖入民協辦事處自動獻身，𠵱家喺屯門區服務。
李八方
